હિંમતનગર: રાજ્યમાં યુવાનોમાં હાર્ટ એટેકનું પ્રમાણ સતત વધી રહ્યું છે અને છેલ્લા ઘણા દિવસથી હાર્ટ એટેકથી મૃત્યુ થવાના કિસ્સાઓ વધી રહ્યા છે ત્યારે હવે હિંમતનગરમાં 21 વર્ષીય યુવકનું હાર્ટ એટેકથી મૃત્યું થયું છે.
ગુજરાતમાં હાર્ટ એટેકથી થતા મૃત્યુના કિસ્સાઓ સતત વધી રહ્યા છે ત્યારે આજે વધુ એક યુવાનનું હાર્ટ એટેકથી મોત થયું છે. હિંમતનગરમાં 21 વર્ષીય યુવાન કેવિન રાવલનું હાર્ટ એટેકથી મોત થયું છે. ગઈકાલે મોડી રાત્રે કેવિન રાવલ તેના ઘરમાં ઢળી પડ્યો હતો જેથી તેને તાત્કાલિક હોસ્પિટલમાં લઈ જવામાં આવ્યો હતો જ્યા તબીબોએ યુવકને મૃત જાહેર કર્યો હતો. કેવિન રાવલે રોબોટિક્સ સાયન્સનો અભ્યાસ પૂર્ણ કર્યો હતો. અચાનક યુવાન પુત્રના અકાળે મોતથી પરિવારજનો આઘાતમાં સરી પડ્યાં હતા.
હજુ ત્રણ દિવસ પહેલા જ અમદાવાદના યુવકનું હાર્ટ એટેકથી મોત થયું હતું. હર્ષ સંઘવી નામનો યુવક રાજસ્થાન તીર્થ યાત્રાથી પરત ફરી રહ્યો હતો ત્યારે બસમાં જ અચાનક હાર્ટ એટેક આવ્યો હતો.
આ ઉપરાંત જામનગર અને સુરતમાં હાર્ટ એટેકના બે બનાવ બન્યા હતા, જેમાં જામનગરમાં પટેલ પાર્ક વિસ્તારમાં 19 વર્ષીય યુવકનું ગરબા પ્રેકિટ્સ કરતાં હૃદય રોગના હુમલાથી અપમૃત્યુ થયુ હતું અને સુરતના કતારગામ GIDC વિસ્તારમાં યુવાનનું ઊંઘમાં હાર્ટ અટેકથી મોત થયું હતું.
આ એકલ-દોકલ કિસ્સો નથી કે જેમાં કોઈ યુવાનને હાર્ટ એટેક આવ્યો હોય પણ ગુજરાતમાં છેલ્લા ઘણાં સમયથી હાર્ટ એટેકના કિસ્સા વધ્યા છે તેનો આ પુરાવો છે.
હ્રદયરોગ પહેલા વૃદ્ધોને થતો હતો અને તેની સંખ્યા પણ મર્યાદિત હતી, પરંતુ કોરોના પછી જ હાર્ટ એટેકના કેસમાં અચાનક વધારો જોવા મળ્યો હતો. મૃત્યુ પામેલાઓમાં યુવાનોની સંખ્યા વધુ છે. જો કે આવું શા માટે થઈ રહ્યું છે તેની પાછળનું કારણ શું છે. આ અંગે હજુ સુધી પૂરતા પુરાવા ઉપલબ્ધ નથી. હાલમાં માહિતી એકત્ર કરવા માટે 3 અલગ-અલગ પ્રકારના સંશોધન ચાલી રહ્યા છે. આ દરમિયાન આ અંગે માહિતી આપવામાં આવી છે. આવો જાણીએ તેના વિશે
સંશોધન પર કેન્દ્રીય સ્વાસ્થ્ય મંત્રી મનસુખ માંડવિયાએ શું કહ્યું?
1. તેમણે કહ્યું કે ભારતમાં 18 થી 45 વર્ષની વયના પુખ્ત વયના લોકોમાં અચાનક મૃત્યુ સાથે સંકળાયેલા પરિબળો પર બહુ-કેન્દ્રિત અભ્યાસ લગભગ 40 હોસ્પિટલો/સંશોધન કેન્દ્રોમાં ચાલી રહ્યો છે.
2. 2022 માં 18 થી 45 વર્ષની વયની વસ્તીમાં થ્રોમ્બોટિક ઘટનાઓ પર કોવિડ રસીની અસર નક્કી કરવા માટે ભારતમાં લગભગ 30 COVID-19 ક્લિનિકલ રજિસ્ટ્રી હોસ્પિટલોમાં અભ્યાસ ચાલી રહ્યો છે.
3. વધુમાં તેમણે જણાવ્યું હતું કે વર્ચ્યુઅલ અને શારીરિક શબપરીક્ષણ દ્વારા યુવાન લોકોમાં અચાનક ન સમજાય તેવા મૃત્યુનું કારણ સ્થાપિત કરવા માટે બીજો અભ્યાસ ચાલી રહ્યો છે.
રિસર્ચ રિપોર્ટ ક્યારે આવશે
કુલ મળીને ત્રણ વિષયો પર સંશોધન અભ્યાસ ચાલી રહ્યો છે.અગાઉ જાણવા મળતું હતું કે અભ્યાસનો રિપોર્ટ જુલાઈ 2023માં જાહેર કરવામાં આવશે. પરંતુ ICMR અભ્યાસના પ્રારંભિક અહેવાલ અંગે ખૂબ જ ઊંડો અભ્યાસ કરી રહ્યું છે. આવી સ્થિતિમાં, તેનો પ્રયાસ છે કે તેના આંકડા અથવા તેનાથી સંબંધિત કોઈપણ માહિતી ત્યારે જ જાહેર કરવામાં આવશે જ્યારે તેની સંપૂર્ણ પુષ્ટિ થઈ જશે.
સરકાર પીડિતો માટે કેવી રીતે કામ કરી રહી છે?
હૃદયરોગ સંબંધિત સ્વાસ્થ્ય સમસ્યાઓના નિવારણ માટે, કેન્દ્રના આરોગ્ય અને પરિવાર કલ્યાણ વિભાગ, બિન-સંચારી રોગોના નિવારણ અને નિયંત્રણ માટેના રાષ્ટ્રીય કાર્યક્રમ (NP-NCD) હેઠળ રાજ્યો અને કેન્દ્રશાસિત પ્રદેશોને તકનીકી અને નાણાકીય સહાય પૂરી પાડે છે.
હૃદયરોગના દર્દીઓને મેડિકલ કોલેજો, એઈમ્સ જેવી કેન્દ્રીય સંસ્થાઓ, કેન્દ્ર સરકારની હોસ્પિટલો અને ખાનગી ક્ષેત્રની હોસ્પિટલોમાં સારવાર અને આરોગ્ય સુવિધાઓ પૂરી પાડવામાં આવે છે.
AIIMS અને અન્ય ઘણી મોટી આરોગ્ય સંસ્થાઓમાં પ્રધાનમંત્રી સ્વાસ્થ્ય સુરક્ષા યોજના હેઠળ હૃદય રોગ અને તેના વિવિધ પાસાઓ પર પણ ધ્યાન કેન્દ્રિત કરવામાં આવ્યું છે.
પ્રધાનમંત્રી જન આરોગ્ય યોજના હેઠળ દર વર્ષે 5 લાખ રૂપિયા સુધીની સારવાર માટે સ્વાસ્થ્ય વીમા કવચ ઉપલબ્ધ કરાવવામાં આવ્યું છે. 60 કરોડથી વધુ લાભાર્થીઓને તેનો લાભ મળી રહ્યો છે.
આ પણ વાંચો-અમદાવાદ: નિર્માણાધીન બિલ્ડીંગમાં દુર્ઘટનાના પગલે ત્રણ શ્રમિકોના મોત
