સુરત: બે-ચાર નહીં 16 બોગસ ડોક્ટરોની ધરપકડ; ધો.10-12 ભણેલા કરી રહ્યા હતા દર્દીઓની સારવાર

સુરત: ગુજરાતમાં નકલી ડોક્ટરોની સંખ્યામાં ખુબ જ વધારો થઈ ગયો છે. ખાસ કરીને ગ્રામીણ વિસ્તારમાં બોગસ ડોક્ટરો ગામે ગામ હોવાનું પણ જાણવા મળી રહ્યુ છે. જો કે, હવે બોગસ ડોક્ટરોની હિંમત શહેરી વિસ્તારમાં પોતાની ક્લિનિક ખોલાવાની હિંમત થઇ રહી છે. પરંતુ સુરત શહેરના ઝૂપડપટ્ટી વિસ્તારમાં બોગસ ડોક્ટરોને પોતાની ડોક્ટરી કરવી ભારે પડી ગઈ છે.

સુરત શહેરના સ્લમ વિસ્તારને ટાર્ગેટ કરી ત્યાંના શ્રમિકોની સારવાર કરનાર 16 જેટલા બોગસ ડોક્ટરની સ્પેશિયલ ઓપરેશન ગ્રુપે ધરપકડ કરી છે. શહેરના સ્લમ વિસ્તારમાં જાણે બોગસ ડોક્ટરોનો રાફડો ફાટ્યો છે. એક સમયે ડોક્ટરને ત્યાં વોર્ડ બોય અને દવા આપનારની નોકરી કરનાર આજે સ્લમ વિસ્તારમાં ક્લિનિક ખોલીને લોકોની સારવાર કરી રહ્યા હતા. સૌથી અગત્યની વાત એ છે કે, આ તમામ ડૉક્ટરો પાસે કોઈપણ પ્રકારની મેડિકલ કે ડૉક્ટરની ડિગ્રી નથી. તેઓ માત્ર ધોરણ-10 અથવા 12 સુધી જ ભણ્યા છે.

સુરત સ્પેશિયલ ઓપરેશન ગ્રુપને માહિતી મળી હતી કે, શહેરના વિસ્તારમાં અનેક બોગસ ડૉક્ટર ક્લિનિક ચલાવી રહ્યા છે. આ બાતમીના આધારે પોલીસે જ્યારે અલગ-અલગ ટીમ બનાવીને શહેરના પાંડેસરા, ઉધના અને ડીંડોલી વિસ્તારમાં રેડ કરી ત્યારે SOG પણ ચોકી ઉઠી હતી. SOGની ટીમ જ્યારે દરેક બોગસ ડોક્ટરની ક્લિનિક પર પહોંચી તો જોયું કે, ત્યાં માત્ર ધોરણ-10 અને 12 સુધી ભણનાર વ્યક્તિ લોકોની સારવાર કરી રહ્યા છે. ક્લિનિકમાં 4-5 એવા દર્દીઓ હતા કે, જેઓને ગ્લુકોઝના બાટલા ચઢાવવામાં આવી રહ્યા હતા.

આ સમગ્ર મામલે SOGના પીઆઇ અતુલ સોનારાએ જણાવ્યું હતું કે, એમની પાસે કોઈ ડીગ્રી નથી અગાઉ કોઈ ડોક્ટર જોડે કમ્પાઉન્ડર હોય અને શીખ્યા હોય તેના અનુસંધાને પોતાની ક્લિનિક ખોલીને તેઓ લોકોની સારવાર તે જ મુજબ કરી રહ્યા હતા. આ તમામ બોગસ ડોક્ટર સ્લમ વિસ્તારને ટાર્ગેટ કરતા હતા. ખાસ કરીને ડીંડોલી, ભેસ્તાન, પાંડેસરા, લિંબાયતને ટાર્ગેટ કરે છે. તેમની વિરુદ્ધ ફરિયાદ દાખલ કરી જે-તે વિસ્તારના પોલીસ સ્ટેશનને આરોપીઓને સોંપવામાં આવશે.

 આ બોગસ ડૉક્ટરો ખાસ ઝૂપડપટ્ટી વિસ્તારને ટાર્ગેટ કરી ત્યાં ક્લિનિક ખોલતા હતા કારણ કે, ત્યાં ગરીબ અને શ્રમિક લોકોની સંખ્યા વધારે હોય છે અને ડોક્ટરની ડિગ્રી અંગે તેઓને કોઈપણ પ્રકારની જાણકારી હોતી નથી. આ બોગસ ડોક્ટરો તેઓને પોતાની ઓળખ ડિગ્રીવાળા ડોક્ટર તરીકે આપે છે અને તેઓ અહીં આવીને સારવાર કરાવી લે છે. તાવ, ઉધરસ, મલેરિયા જેવાં રોગોનો સારવાર કરતાં હતાં. એક દર્દી પાસેથી રૃપિયા 50થી લઈ 500 દવા પ્રમાણે આ લોકો સારવારના નામે લેતા હતા.

  સામાન્ય રીતે જ્યારે પણ આવા પ્રકરણમાં ડોક્ટરની ધરપકડ કરવામાં આવે છે ત્યારે તેઓની પાસે હોમિયોપેથી અથવા તો આયુર્વેદિક ની ડિગ્રી મળી આવતી હોય છે પરંતુ, જ્યારે સુરતના વિસ્તારમાં SOG દ્વારા રેડ કરવામાં આવી ત્યારે આ તમામ ઝોલાછાપ ડૉક્ટરો પાસે ગ્રેજ્યુએશન સુધીની ડિગ્રી પણ નહોતી અને તેઓ કોઈપણ પ્રકારના ડરથી મુક્ત થઈ આરામથી લોકોની સારવાર કરી રહ્યા હતા.

તેઓએ જણાવ્યું હતું કે, આ ડોક્ટરો પાસે કોઈપણ પ્રકારની ડિગ્રી નથી. આ લોકો માત્ર 10થી 12 પાસ છે. લોકોને પોતાની ઓળખ ડૉક્ટર તરીકે આપી લોકોની સારવાર કરતા હતા. તેમની પાસેથી એન્ટીબાયોટિક, ઇન્જેક્શન પેઈન કિલર, બીપીના મશીન, ગ્લુકોઝના બાટલા મળી આવ્યા છે. જે દવા અને ઉપકરણ સામાન્ય ડોક્ટર રાખે છે, તે તમામ પ્રકારના ઉપકરણ અને દવાઓ એમની પાસે ઉપલબ્ધ હતા.

 SOG દ્વારા બોગસ ડૉક્ટરો સામે એક મુહિમ ચલાવવામાં આવી હતી. એમાં પાંડેસરા અને ડીંડોલી વિસ્તારની અંદરથી અલગ-અલગ જેટલા પણ સ્લમ વિસ્તાર છે ત્યાં સુરત મહાનગરપાલિકાના ડોક્ટરોની ટીમને સાથે રાખીને રેડ કરવામાં આવી હતી. ડીંડોલી વિસ્તારમાંથી સાત, પાંડેસરા વિસ્તારમાંથી નવ બોગસ ડોક્ટરો મળી આવ્યા હતા.

બનાસકાંઠાના ગામડાઓમાં બોગસ ડોક્ટરોનો છે રાફડો

બનાસકાંઠાના ગામડાઓમાં બોગસ ડોક્ટરોની મોટા પ્રમાણમાં સંખ્યા હોવાનું જાણવા મળી રહ્યું છે. પરંતુ આ ડોક્ટરો ઉપર સરકારી ડોક્ટરો રહેમનજર રાખી રહ્યો હોવાની માહિતી પણ વિશ્વસનિય સુત્રો પાસેથી સામે આવી રહી છે. જણાવી દઇએ કે, ઘણા ડોક્ટર તો એવા છે કે, જેમણે પોલીસ ઉઠાવી ગઇ હોવા છતાં છૂટીને ફરીથી મેડિકલ સેવાઓ આપવા લાગે છે. આમ બનાસકાંઠામાં લોકોના સ્વાસ્થ્ય સાથે મોટા પાયે ચેડાઓ કરવામાં આવી રહ્યા છે, પરંતુ ઝોલાછાપ ડોક્ટરોને રોકવાની જવાબદારી ધરાવતા જવાબદાર અધિકારીઓ આંખ આડા કાન કરી રહ્યા છે.  તેથી બનાસકાંઠાના બોગસ ડોક્ટરોને નાંથવા માટે બીકેના સ્પેશ્યલ ઓપરેશન ગ્રુપને એક્ટિવ થવું પડશે તેવું લાગી રહ્યું છે.