ગુજરાત હાઇકોર્ટ રખડતાં ઢોર-ટ્રાફિક સમસ્યાને લઇને આકરા પાણીએ; પોલીસ બેડાને આકરા પ્રશ્નો

ગુજરાત હાઇકોર્ટમાં આજે રખડતાં ઢોર, ટ્રાફિક સમસ્યા અને ખરાબ રસ્તાઓ મુદ્દે એડવોકેટ જનરલની હાજરીમાં સુનાવણી યોજાઈ છે. આ સુનાવણી અત્યારે ટ્રાફિક સમસ્યા ઉપર કેન્દ્રિત થઈ છે. કોર્ટમાં ટ્રાફિક જોઈન્ટ કમિશ્નર ઓફ પોલીસે આપેલી માહિતી પ્રમાણે ટ્રાફિક નિયમોના પાલનમાં પોલીસને પ્રજાના સહકારની અપેક્ષા છે. લોકોને ટ્રાફિક નિયમો અંગે જાગરૂક કરવા સેમિનાર, હોર્ડીંગ, બેનર્સ અને રોડ શો જેવા કાર્યક્રમો યોજવામાં આવે છે. જો કે અરજદારે વધુ સમય માગતા હવે રિસેસ બાદ વધુ સુનાવણી યોજાશે.

હાઇકોર્ટમાં ટ્રાફિક JCPની એફિડેવિટ ઉપર ચર્ચા કરવામાં આવી છે. લોકોના સહકારની અપેક્ષા ઉપર અરજદારે કહ્યું કે તમારે કાયદાનું પાલન કરાવવાનું છે, તમે શું કામ કર્યું તે કહેવાનું છે. કોર્ટે કહ્યું કે, કાગળો ઉપર બધું છે, રોડ ઉપર કામ નહીં. તમારા કોન્સ્ટેબલ શું કરે છે જુઓ. ગલ્લે પાન ખાતા લોકો અને કોન્સ્ટેબલના રોડ ઉપર થતાં કામમાં કોઈ ફેર નહીં.

આ મામલે અરજદારે સમય માંગતા વધુ સુનાવણી બપોરના 2.30 વાગ્યે યોજાશે. કોર્ટે કહ્યું અમદાવાદ ફક્ત ત્રણ વિસ્તારમાં નથી ,વળી આ મેટર આખા રાજ્ય માટે છે. બધું બધાને દેખાય છે, લોકો રોડ ઉપર ફરતા જ હોય છે. અરજદારે કહ્યું કે, પ્રયાસ શેના આ તેમની ફરજ છે? મોટા સાહેબ આવે ત્યારે બધા રસ્તા બંધ થઈ જાય છે ત્યારે ક્યાંથી ફોર્સ આવે છે? જેથી કોર્ટે કહ્યું કે, હવે મોટા સાહેબને કોર્ટમાં બોલાવવા પડશે.